अज्ञात व्यक्तिले अपहरण गरेको भनेर झुक्याउने सिन्धुपाल्चोकका एक व्यक्तिलाई १८ घण्टापछि प्रहरीले पक्राउ गरेको छ । प्रहरीका अनुसार यस्तो झुटो कुरा गर्ने बाह्रबिसे नगरपालिका–४ का जीवन खत्रीलाई नियन्त्रणमा लिइएको हो । ऋण तिर्न नसकेपछि उनले आफू अपहरणमा परेको सूचना प्रहरीलाई दिएका थिए ।

यस्तो खबर आएपछि प्रहरी परिचालन गरिएको र जाँचबुझका क्रममा उनी अपहरणमा नपरेको पाइएको सिन्धुपाल्चोक जिल्ला प्रहरी कार्यालयका प्रमुख प्रज्वल महर्जनले जानकारी दिए । अपहरणको नाटक गरी झुटा अफवाह फैलाइ समाजमा नकारात्मक प्रभाव पारेको अभियोगमा उनीविरुद्ध मुद्दा दर्ता गरी थप अनुसन्धान भइरहेको उनले बताए ।

गत बुधबार साँझ ७ बजे सुनकोसी गाउँपालिका–५,यमुनाडाँडास्थित फूपूको घरमा बसिरहेको अवस्थामा खत्रीलाई प्रहरीले पक्राउ गरेको हो । वर्ष दिन अघिदेखि गाउँमा कुखुरापालन गरेर बसेका उनले लिएको ऋण तत्काल तिर्नुपर्ने र उनले तिर्न नसकेपछि यस्तो नाटक गरेको प्रारम्भिक अनुसन्धानबाट खुल्न आएको प्रहरीले जनाएको छ ।