नेपाली लेग स्पिनर सन्दिप लामिछाने सम्मिलित जमैका तलावाजले क्यारेबियन प्रिमियर लिग (सीपीएल) मा विजयी सुरूवात गरेको छ ।

बुधबार राती भएको खेलमा जमैका तलावाजले लुसिया जोउक्सलाई ५ विकेटले पराजित गर्दै सुखद् सुरूवात गरेको हो ।

खेलमा टस हारेर लुसिया जोउक्स सुरूमा ब्याटिङ गरेको थियो भने जोउक्सले दिएको १ सय ५९ रनको लक्ष्य जमैकाले १८ ओभर ५ बलमा पुरा गर्यो ।

जमैकाको जितमा आसिफ अलि,ग्लेन फिलिप्स तथा रोभम्यान पोवेलले क्रमशः ४७, ४४ र २६ रनको योगदान गरे । आन्द्रे रसेलले १६ रन बनाउँदा कार्लोस ब्रेथवेटको नाममा अविजित १८ रन रह्यो ।

सेन्ट लुसियाका लागि रोस्टन चेसले ५२ रनको अर्धशतकीय इनिङ्स खेलेका थिए ।

जमैकाका लागि सन्दीपले ४ ओभर बलिङ गर्दै २३ रन खर्चिएर १ विकेट लिए । आन्द्रे रसेलले पनि एक विकेट लिए ।

जितसँगै जमैकाले १ खेलमा २ अंक जोडेको छ । जमैका तालिकाको शीर्ष स्थानमा रहेको छ । जमैकाले अब ट्रीनबागो नाइट राईडर्ससँग खेल्नेछ ।