दुई थान पेस्तोल र दस राउन्ड गोलीसहित दुईजना पक्राउ
काठमाडौं प्रहरीले दुई थान पेस्तोल र दस राउन्ड गोलीसहित दुईजनालाई पक्राउ गरेको छ । महानगरीय अपराध महाशाखाका एसपी होविन्द्र बोगटीका अनुसार माछापोखरीबाट बुधबार दुईवटा पेस्तोल, त्यसमा लाग्ने दुई म्यागजिन र १० राउन्ड गोलीसहित एक जनालाई पक्राउ गरेको हो ।
उनका अनुसार माछापोखरीबाट पक्राउ पर्नेमा नुवाकोटको शिखरवेसी–६ का विकेश पण्डित रहेका छन् । पण्डितले दिएको जानकारीका आधारमा प्रहरीले नुवाकोट लिपु गाउँपालिकाका २८ वर्षीय अमर तामाङलाई पक्राउ गरेको हो ।
तामाङले दिएको हतियार लिएर आउने क्रममा पण्डित पक्राउ परेका थिए । त्यसपछि अपराध महाशाखाको टोलीले नुवाकोटमा पठाएर तामाङलाई उनकै घरबाट पक्राउ गरेको एसपी बोगटीले जानकारी दिए ।
