बाँके । ससुरालीमा जग्गा खरिदका लागि राखिएको नगद हात पार्न बाँकेमा एक व्यक्तिले नाबालक सालाको अपहरण गरेका छन् । आफ्नै सालालाई अपहरण गरेर ससुरालीसंग १० लाख रुपैयाँ फिरौती माग्ने नेपालगञ्ज १६ का कल्लु भन्ने कलिम खाँलाई बाँके प्रहरीले पक्राउ गरेको हो ।

अपहरण गरेर कलिमले सालालाई आफ्नै घरमा राखेका थिए । सालालाई घरमा राखेर ससुरालीमा दश लाख रुपैया फिरौती मागेका थिए । १० गते घरपरिवारले प्रहरीलाई खबर गरेको थियो । बालक अपहरण गरेको भोलिपल्ट खबर पाएको प्रहरीले रातभर अप्रेशन चलाएर उनको उद्दार गरेको जिल्ला प्रहरी कार्यालय बाँकेका प्रमुख प्रहरी उपरिक्षक ओम बहादुर रानाले जानकारी दिए ।

जग्गा खरिदका लागि ससुराले चार लाख ८५ हजार रुपैयाँ नगद घरमा राखेको अभियुक्त कल्लुले थाहा पाएपछि सालाको अपहरण गरेका हुन् । अपहरणपछि बालकलाई दुई दिनसम्म जयसपुरको घरमै राखेको र पछि अरुले थाहा पाएको र प्रहरीले खोजी गर्दै जाँदा भदौ ११ गते जानकी गाउँपालिका ५ बुढियागाउँमा बालकलाई फुपूको घरमा छोडिएको प्रहरीले जनाएको छ ।