काठमाडौं । बंगलादेशविरुद्ध दुई मैत्रीपूर्ण खेल खेल्ने तयारीमा रहेको नेपाली राष्ट्रिय फुटबल टोलीका एक खेलाडीमा कोरोना संक्रमण देखिएको छ । टोली गत साता बंगलादेश पुगेपछि मंगलबार गरिएको परिक्षणमा टोलीका एक खेलाडीमा संक्रमण देखिएको बंगलादेश फुटबल महासंघले जनाएको छ । यद्यपि टोली बंगलादेश पुगेपछि शुक्रबार गरिएको पहिलो परिक्षणमा भने सबै खेलाडीको रिपोर्ट नेगेटिभ आएको थियो । हाल संक्रमित खेलाडी आइसोलेसनमा रहेका छन् ।

नेपाली टोलीमा बंगलादेश प्रस्थान गर्नुअघि नै ३४ सदस्यीय प्रारम्भिक टोलीका ७ खेलाडीमा संक्रमण देखिएको थियो । प्रशिक्षण सुरु हुनुअघि ५ र प्रस्थान गर्नुभन्दा केहि दिन अघि थप दुई खेलाडीमा संक्रमण देखिएको थियो । बंगलादेश प्रस्थान गरेका सबै खेलाडीको रिपोर्ट नेगेटिभ नै आएको थियो । नेपालले कार्तिक २८ र मङ्सिर २ गते बंगलादेशविरुद्ध खेल्दैछ । दुवै खेल ढाकास्थित बंगबंधु रंगशालामा हुनेछ । खेल नेपाली समयानुसार साँझ ४:४५ बजे सुरु हुनेछ ।