एजेन्सी । अभिनेत्री कंगाना रनावतको ३४औं जन्मदिनको अवसरमा मंगलवार फिल्म ‘थलाइवी’ को ट्रेलर रिलिज गरिएको छ । अभिनेत्री तथा तमिलनाडुकी पूर्व मुख्यमन्त्री स्वं. जयललिताको जीवनीमा आधारित भएर बनेको फिल्मको ट्रेलरमा उनको अभिनय करिअरदेखि राजनीतिमा प्रवेश गरेपछि आएका उतार–चढाव देखाइएको छ । ३ मिनेट २३ सेकेण्डको ट्रेलर दमदार बनेको छ ।

ट्रेलरमा विधानसभामा डिएमकेका संसदले जयललितामाथि गरेको अभद्र व्यवहारको दृश्य पनि देखाइएको छ । कंगनामाथि फिल्मांकन गरिएको डाइलगले महिला सशक्तिकरणको झलकसँगै महिलाको तागत देखाउँछ । फिल्ममा कंगना दुरुस्तै जयललिता देखिएकी छन् । उनको अभिनय बुलन्द छ । उनले फिल्मका लागि २० केजी तौल बढाएर केही महिनामा त्यति नै घटाएकी थिइन् ।

ए.एल विजयको निर्देशनमा बनेको फिल्ममा कंगनाका अलावा अरविन्द स्वामी, नसर, भाग्यश्री, राज अर्जुन र मधु बालाको पनि मुख्य भूमिका छ । हिन्दी, तमिल र तेलुगू भाषामा निर्माण भएको फिल्म २३ अप्रिल २०२१ मा प्रदर्शनमा आउँदैछ । फिल्मको ट्रेलर सार्वजनिक भएसँँगै दर्शकबाट उत्कृष्ट प्रतिक्रिया मिलेको छ । ट्रेलरले दर्शकमा फिल्मप्रति उत्सुकता र कौतुहलता जगाएको छ ।