बलिउड अभिनेता दिलीप कुमारको निधन !
एजेन्सी । चर्चित बलिउड अभिनेता दिलीप कुमारको निधन भएको छ । अभिनेता दिलिप कुमारको ९८ वर्षको उमेरमा आज निधन भएको हो।
लामो समयदेखि बिरामी रहेका दिलीपको ९८ बर्षको उमेरमा आज बिहान साढे ७ बजे निधन भएको भारतीय सञ्चारमाध्यमले जनाएका छन् ।
घरमै उपचार गराउँदै आइरहेका दिलीपको स्वास्थ्य अवस्था अचानक बिग्रन थालेपछि मुम्बईको हिन्दुजा अस्पताल भर्ना गरिएको थियो । उनलाई फोक्सोमा संक्रमण देखिएको थियो । स्वास्थ्यमा समस्या देखिएपछि उनलाई धेरै पटक अस्पतालमा भर्ना गरिएको थियो ।
उनले ८ पटक ‘बेस्ट एक्टर’ का रूपमा फिल्मफेयर अवार्ड पाएका थिए । यस्तै हिन्दी सिनेमामा सबैभन्दा ठूलो सम्मान मानिने ‘दादा साहेब’ फाल्के अवार्डबाट पनि उनलाई सम्मानित गरिएको थियो । सन २०१५ मा भारत सरकारले उनलाई पद्म भूषण पनि दिएको थियो ।
