मंसिर ५, काठमाडौँ । बाजुरामा अनेरास्ववियुका विद्यार्थी नेताको विभत्स हत्या भएको छ। आइतबार मतदानका क्रममा भएको विवादलाई लिएर राति घरमा आक्रमण गरेर त्रिवेणी नगरपालिका–७ का चेतन अयडीको हत्या गरिएको जिल्ला प्रहरी कार्यालय बजुराले जनाएको छ।

बाजुराका प्रमुख प्रहरी नायब उपरीक्षक डीएसपी सुर्य थापाले कुटपिटबाट गम्भीर घाइते भएका अयडीको उपचारका क्रममा बयलपाटा अस्पतालमा मृत्यु भएको जानकारी दिए।

उनकाअनुसार वडा नम्बर ७ को नाटेश्वरी मतदान केन्द्रमा भएको विवादको विषयलाई लिएर अयडीमाथि आक्रमण गरिएको हो। अयडी नेकपा एमाले सम्बद्ध अनेरास्ववीयु सुदूरपश्चिम विश्वविद्यालयका अध्यक्ष हुन्।

आइतबार मतदानका क्रममा एमाले र कांग्रेसका कार्यकर्ताबीच भएको विवादका क्रममा प्रहरीले चलाएको गोली लागेर नेपाली कांग्रेसका कार्यकर्ता २५ वर्षीय सुरेन्द्र अयडीको मृत्यु भएको थियो। घटनामा अन्य तीन जना घाइते भएका थिए।