अष्ट्रेलियालाई हराउँदै अर्जेन्टिना विश्वकप फुटबलको क्वार्टरफाइनलमा प्रवेश
मंसिर १८, काठमाडाैँ। अष्ट्रेलियालाई पराजित गर्दै अर्जेन्टिना विश्वकप फुटबलको क्वार्टरफाइनलमा प्रवेश गरेको छ। इतबार बिहान अहमाद बिन अलि स्टेडियममा भएको खेलमा अर्जेन्टिनाले अष्ट्रेलियालाई २–१ गोल अन्तरले पराजित गर्दै क्वार्टर फाइनलमा प्रवेश गरेको हो।
अर्जेन्टिनाको जितमा कप्तान लियोनल मेसीले ३५ औँ मिनेटमा र जुलियन अल्भारेजले ५७ औँ मिनेटमा गोल गरेका थिए। अल्भारेजले अष्ट्रेलियाका गोलकिपर म्याटी राइनले गरेको गल्तीमा गोल गरेका थिए।
त्यस्तै, अष्ट्रेलियाले भने अर्जेन्टिनाका एन्जो फर्नान्डेजको आत्मघाती गोलमार्फत खेलमा फर्किने प्रयास गरेको थियो।
अब अर्जेन्टिनाले क्वार्टर फाइनलमा नेदरल्याण्डससँग खेल्नेछ।
