माघ १०, काठमाडौँ । सोमबार १ लाख ५० हजार रुपैयाँ घुससहित पक्राउ परेका त्रिभुवन अन्तर्राष्ट्रिय विमानस्थल आन्तरिक टर्मिनल व्यवस्थापन शाखा प्रबन्धक पूर्ण प्रसाद चुडालको साथबाट थप ८ लाख रुपैयाँ बरामद भएको छ।

अख्तियार दुरुपयोग अनुसन्धान आयोगको टोलीले उनकै कार्यकक्षबाट उनलाई घूस र स्रोत नखुलेको थप ८ लाख रुपैयाँसहित पक्राउ गरेके हो।

चुडालले एयरपोर्ट (आन्तरिक टर्मिनल) सम्म आवातजावत गर्न पास उपलब्ध गराई सहजीकरण गरिदिएको भन्दै सेवाग्राहीसँग १ लाख ५० हजार रुपैयाँ घुस मागेको उजुरी परेको थियो। सोही उजुरी निवेदनका आधारमा अख्तियारको टोलीले सुरुमा चुडाललाई सेवाग्राहीसँग एक लाख पचास हजार रुपैयाँ घुस लिइसकेको अवस्थामा कार्यकक्षबाट रंगेहात पक्राउ गरेको हो।

सो पश्चात नियन्त्रणमा लिइ खानतलासी गर्दा कार्यकक्ष भित्र रहेको स्टिलको दराजबाट स्रोत नखुलेको नगद थप ८ लाख रुपैयाँ बरामद भएको अख्तियार प्रवक्ता श्याम प्रसाद भण्डारीले जारी गरेको विज्ञप्तिमा उल्लेख छ । उनीमाथि थप अनुसन्धान भइरहेको अख्तियारले जनाएको छ ।