वैशाख २, मेलबर्न, अष्ट्रेलिया । अष्ट्रेलियन प्रहरीले यात्रुहरूलाई चेतावनी दिएको छ। पछिल्लो ६ महिनामा एडिलेड एयरपोर्टमा हतियार र प्रतिबन्धित वस्तुहरू यात्रुहरूले ल्याउने क्रम बढेको भन्दै चेतावनी दिएको हो।

अष्ट्रेलियाको संघीय प्रहरी (एएफपी) सर्जेन्ट पल एभरिङहमले गत वर्ष नोभेम्बरदेखि एयरपोर्टमा प्रस्थान स्क्रिनिङ बिन्दुहरूमा ३५ वटा साना चक्कुहरू फेला परेका छन्। उनले दिएको जानकारी अनुसार त्यस्ता चक्कुहरू क्रेडिट कार्डमा नै लुकाउन सकिनेछ।

विगत ६ महिनामा यात्रुहरूबाट गोलाबारुद, नकल डस्टर, स्पड गन, जेल ब्लास्टर र छुरीसमेत बरामद गरिएको सर्जेन्ट एभरिङघमले बताएका छन्।

‘टर्मिनलहरूमा फेला पर्दा यी वस्तुहरूसँग एएफपीसँग शून्य सहनशीलता हुनेछ।’ उनले भनेका छन्। ‘जे जस्तो कारण भएता पनि हवाईअड्डा र विमानहरूमा लगायत सार्वजनिक स्थानमा चक्कु बोक्नु अपराध हो।’

विमानस्थलमा निषेधित वस्तु बोक्ने व्यक्तिलाई २ हजार ५०० डलर जरिवाना वा ६ महिनाको जेल सजाय हुन सक्छ। सर्जेन्ट एभरिङ्घमले प्रहरीले यस्ता घटनाहरूमा निगरानी बढाउन प्रहरीको संख्या बढाउने बताएका छन्।

एएफपीले नोभेम्बरदेखि एडिलेड एयरपोर्टमा मादक पदार्थ सेवन वा आपत्तिजनक व्यवहार, सार्वजनिक अशान्ति र प्रतिबन्धित वस्तुहरू र चोरीमा आक्रमण गरेको लगायतका अपराधमा १४ जनालाई अभियोग लगाइएको जनाएको छ।