वैशाख ९, मेलबर्न, अष्ट्रेलिया । न्यु साउथ वेल्स पुलिसले सिड्नीको पश्चिममा बेवारिसे अवस्थामा नवजात शिशु फेला पारेको छ। बेवारिसे अवस्थामा नवजात शिशु फेला परेपछि प्रहरीले आमाको खोजी सुरू गरेको छ।

शुक्रबार दिउँसो ब्ल्याकटाउनको गिर्रा रोडमा रहेको एक घरबाहिर एक दिन पहिले जन्मिएकी बालिका फेला परेको प्रहरीले जानकारी दिएको छ।

करीब ३ बजेतिर ब्ल्याकटाउन पुगेका प्रहरी अधिकारीहरूले दुई तले घर बाहिर बालिका फेला पारेका थिए। बच्चालाई दिउँसो १२ः३० देखि २ः४० बजेसम्म घरमा छाडिएको हुनसक्ने प्रहरीको अनुमान छ।

न्यु साउथ वेल्सका एम्बुलेन्स प्यारामेडिकहरूले सुरुमा नवजात शिशुलाई ब्ल्याकटाउन अस्पताल लैजानु अघि घटनास्थलमा उपचार गरे। बालिकाको अवस्था सामान्य रहेको बताइएको छ।

प्रहरीले आमाको खोजी कार्य जारी राखेको छ। घर मालिकले उक्त बालिका नचिनेको बताएका छन्।