वैशाख २०, मेलबर्न, अष्ट्रेलिया । अष्ट्रेलियाका टेनिस स्टार निक किर्गियोसको लक्जरी कार चोरेको आरोपमा एक जना पकाउ परेका छन्। किर्गियोस नभएको समयमा उनकी आमालाई त्रास देखाएर गाडी चोरेको अभियोगमा एक जना पक्राउ परेका हुन्।

पक्राउ पर्नेमा ३२ वर्षीय पुरूष रहेका छन्। वाट्सनमा धम्कीपूर्ण व्यहार गरेको अभियोगमा उनलाई प्रहरीले पक्राउ गरेको हो। मंगलबार उनले क्यानबेरामा रहेको अदालतको सामना समेत गरेका छन्।

किर्गियोसले पुलिसलाई हरियो टेस्लाको स्थान ट्र्याक गर्न मद्दत गरेका थिए। जसका कारण अभियुक्त पक्राउ गर्न प्रहरीलाई सहज भएको थियो।

‘बिहान ८ : ३० बजेतिर, कालो कपडा लगाएका र अनुहार छोपेका एक व्यक्तिले घरमा पार्क गरिएको टेस्लाको साँचो मागेर निवासमा एक महिलालाई बन्दुक लिएर धम्की दिएको प्रहरीलाई खबर प्राप्त भयो।’ प्रहरीले भनेको छ।

एसिटीको प्रहरी विभागले विभिन्न पक्षहरूसँग समन्वय गरेर बिहान ९ः ०५ बजे नै आरोपितलाई पक्राउ गर्न सफल भएको जानकारी दिएको छ।

मंगलबार अदालत सामना गरेका आरोपितलाई डकैती, चोरीको सवारी चलाउने, क्रोधपूर्ण सवारी सञ्चालन लगायतका अभियोग लगाइएको छ।

अदालतले उनलाई  जमानत दिन अस्विकार गरेका कारण फैसला नहुन्जेलसम्म उनी प्रहरी हिरासतमा नै रहने बताइएको छ।