वैशाख २१, मेलबर्न, अष्ट्रेलिया। द्वन्द्वग्रस्त मुलुक सुडानबाट ३६ जना अष्ट्रेलियन नागरिकको उद्धार गरिएको छ।

रोयल अष्ट्रेलियाली वायुसेनाको उद्धार उडानले सुडानबाट ३६ अष्ट्रेलियन नागरिक र उनीहरूका परिवारलाई मुलुकबाट बाहिर निकालेको हो। विदेश मन्त्री पेनी वोङले यो खबर पुष्टि गरेकी छन्।

तीन हप्तादेखि भीषण युद्ध भइरहेको सुडाननबाट १९० जना अष्ट्रेलियन नागरिक तथा उनीहरूको परिवार बाहिर निस्किएको वोङले ट्विटमार्फत जानकारी दिएकी छन्।

अष्ट्र्रेलियाको उद्धार उडानमार्फत अन्य ६ मुलुकका नागरिकहरूको समेत उद्धार गरिएको छ। मन्त्री वोङले सुडानमा भएका अन्य अष्ट्रेलियन नागरिकहरूसँग पनि उद्धार गर्ने उद्देश्य सहित सम्पर्कमा रहेको जानकारी दिएकी छिन्।

उनले एबिसी अष्ट्र्रेलियासँगको संवादमा अझै केही अष्ट्रेलियन नागरिकहरू सुडानमै रहेको बताएकी छिन्।

परराष्ट्र तथा व्यापार विभागले युद्धग्रस्त राष्ट्रको अवस्था खतरनाक रहेको बताएको छ। सुडानमा अप्रिल १५ मा सेना र र्‍यापिड सपोर्ट फोर्स भनिने प्रतिद्वन्द्वी अर्धसैनिक समूहबीच भिडन्त सुरु भएको थियो।

तिनीहरूको शक्ति संघर्षले लाखौं सुडानीहरूलाई बन्दुकको लडाइँ, तोपखाना बमबारी र हवाई आक्रमणको लाइनमा राखेको छ। दशौं हजार खार्तुम र अन्य शहरहरू भागेका छन्।

द्वन्द्व सुरु भएदेखि कम्तीमा ४३६ सर्वसाधारण मारिएका छन् भने १२ सयभन्दा बढी घाइते भएका छन्।