जेठ १६, मेलबर्न, अष्ट्रेलिया । अष्ट्र्रेलियाको प्रहरीले सिड्नीमा जलेर ध्वस्त भएको भवनको भग्नावशेषमा जलेका शव भेटाउन सकिने सम्भावना रहेको बताएको छ। सोही शंकाबिच प्रहरीले अहिले उक्त भवनमा खोजी सुरू गरेको जानकारी दिइएको छ।

प्रहरीले सम्पदा भवनलाई भत्काउने तयारी गर्न थालेपछि भग्नावशेषको खोजीकर्ताहरूलाई सहयोग गर्न शव पत्ता लगाउने कुकुरहरू प्रयोग गर्ने भएको छ।

गत बिहीबार आगलागी हुँदा घटनास्थलमा रहेको विश्वास गरिएको एक किशोरलाई प्रहरीले सोधपुछ गर्ने तयारी गरिरहेको छ। यसभन्दा अगाडी प्रहरीले १२ वर्षीय एक जना र १३ वर्षीय २ बालकलाई पक्राउ गरि सोधपुछ गरिरहेको छ।

डिटेक्टिभ सुपरिटेन्डेन्ट गोर्डन अर्बिन्जाले उनीहरू विरुद्ध अभियोग लगाउने संभावना देखिएको बताएका छन्।

“हामी सम्पूर्ण अनुसन्धान मार्फत जान्छौं र त्यसपछि हामी यो मामिला समाधान गर्न सबैभन्दा राम्रो र सबैभन्दा उपयुक्त उपाय के हो भनेर काम गर्नेछौं,” उनले भने।

उनले किशोरीहरूले प्रहरीलाई के बताए भन्ने खुलासा गरेका छैनन्। उनले ती बालकका अभिभावकहरू पनि सोधपुछका क्रममा सँगै रहेको बताएका छन्। अनुसन्धान जारी रहँदा उनले थप किशोरकिशोरीहरूसँग कुरा गर्ने अपेक्षा गरेका छन्।

अस्थिर पर्खालहरूले सार्वजनिक सुरक्षा र वरपरका भवनहरूको स्थिरताका लागि खतरा उत्पन्न गरेका कारण भत्काउने तयारी गरिएको हो। उक्त भवनको भग्नावशेष मुनि अझै आगो बलिरहेको बताइएको छ।

आगलागीको समयमा उक्त भवनमा सुतिरहेका दुई घरबारविहीन व्यक्तिहरू बेपत्ता भएको प्रहरीले बताएको छ।

“हामी भग्नावशेषमुनि मानिसहरु रहेको कुरालाई नकार्न सक्दैनौं।” डिटेक्टिभ सुपरिटेन्डेन्ट अर्बिन्जाले भने।

सरी हिल्सस्थित पुरानो टोपी कारखानामा बिहीबार भएको भीषण आगलागीका कारण सयभन्दा बढी मानिस घर छाड्न बाध्य भएका छन्। अहिले फायर एण्ड रेस्क्यु न्यु साउथ वेल्सले उक्त भवन भत्काउने तयारी सुरू गरेको छ।

भवन सुरक्षित छ भनी सुनिश्चित गर्नको लागि सरसफाई कार्यले केही दिन लाग्ने अपेक्षा गरिएको छ। सम्पदा वास्तुकार हेक्टर अब्राहम्सले जलेको भवनको धेरै पर्खालहरू बचाउन सकिने बताएका छन्।

उनले २० औं शताब्दीको प्रारम्भमा निर्मित इँटाहरू आगोबाट राम्रोसँग बच्न सक्ने र बाक्लो पर्खालहरू संरचनात्मक रूपमा तापक्रम सहन सक्ने बताएका छन्।