२ दिनमा नै सिड्नी एयरपोर्टमा सयाैँ उडान रद्द
असार १७, मेलबर्न, अष्ट्रेलिया । हावाहुरीका कारण दोस्रो दिन पनि उडान रद्द र ढिलाइ हुँदा सिड्नी विमानस्थलमा यात्रुहरु मारमा परेका छन्। सिड्नी एयरपोर्टमा २ दिनको अवधिमा नै सयाैँको संख्यामा उडानहरू रद्द भएका छन्।
न्यू साउथ वेल्समा विद्यालय बिदाको पहिलो दिनसँगै शनिबार सिड्नी जाने र आउने ३० भन्दा बढी उडानहरू रद्द भएका थिए। सिड्नी एयरपोर्टले शनिबार बिहान पछि सुरक्षाका कारण एयर ट्राफिकलाई एउटै रनवेमा प्रतिबन्धित गर्ने सल्लाह दिएको थियो।
तीव्र क्रसवाइन्डका कारण शुक्रबार १०० भन्दा बढी उडानहरू रद्द गरिएका थिए। शुक्रबार नै एयर ट्राफिक कन्ट्रोलरको अभावको कारणले गर्दा ब्रिस्बेन एयरपोर्टमा अवरोध सिर्जना भएको थियो।
