श्रावण १५, मेलबर्न, अष्ट्रेलिया । सिड्नीको एक नाइट क्लब बाहिर दुई जनामाथि छुरा प्रहार गरिएको छ। सिड्नीको भित्री सहरको नाइटक्लबबाहिर एक व्यक्तिले दुई जनामाथि धारिलो हतियारले आक्रमण गरेका हुन्।

शनिबार बिहान ३ बजेपछि सरी हिल्सको अक्सफोर्ड सेन्टमा रहेको क्लबबाहिर धेरै पटक छुरा प्रहार गर्दा २५ वर्षीय एक युवक गम्भीर घाइते भएका छन्।

उनलाई बचाउन गएका ३४ वर्षीय पुरुषलाई पनि छुरा प्रहार गरिएको प्रत्यक्षदर्शीले बताएका छन्।

चक्कु बोकेको मानिस त्यहाँ आक्रमण गरेर भागेको बताइएको छ। प्रत्यक्षदर्शीहरूले अन्य पुरूषहरूसँग उक्त व्यक्ति पाल्मर सेन्ट तर्फ भागेको बताएको प्रहरीले जानकारी दिएको छ।

चक्कु प्रहारबाट घाइते भएका व्यक्तिलाई उनका साथिहरूले सेन्ट भिन्सेन्ट अस्पताल लगेका थिए। उनी गम्भीर तर स्थिर अवस्थामा रहेको जानकारी दिइएको छ।

३४ वर्षीय अर्का पुरुषको देब्रे हात र दाहिने हातको उपचार गरिएको छ। उनको अवस्था पनि स्थिर रहेको जानकारी दिइएको छ।

प्रहरी र डिटेक्टिभहरूले यस घटनाको अनुसन्धान गरिरहेको बताइएको छ।