साउन १६, मेलबर्न, अष्ट्रेलिया । क्वीन्सल्याण्डको तटमा हेलिकप्टर दुर्घटनामा परी ज्यान गुमाएका चारजना बेपत्ता सैनिकहरूलाई मृत घोषित गरिएको छ। २ दिनसम्मको खोजीमा पनि उनीहरूलाई फेला पार्न नसकिएपछि मृत घोषित गरिएको हो।

उनीहरूलाई मृत घोषित गरिएसँगै सहकर्मी, परिवार, साथीभाइ र सरकारले उनीहरूको सेवाको कदर गर्दै सम्मान प्रकट गरेका छन्।

रक्षा मन्त्री रिचर्ड मार्ल्सले MRH-90 Taipan हेलिकप्टरको टुक्रा फेला परेको बताएका छन्। सैन्य तालिममा सहभागि उक्त हेलिकप्टर ह्यामिल्टन टापु नजिकै रहेको लिन्डम्यान आइल्याण्ड नजिकै शुक्रबार राती करिब ११ बजे खसेको थियो।

जहाजमा रहेका र बेपत्ता भएकाहरुको पहिचान खुलेको छ। उनीहरू क्याप्टेन ड्यानियल लियोन, लेफ्टिनेन्ट म्याक्सवेल न्युजेन्ट, कर्पोरल अलेक्जेन्डर नाग्स र वारेन्ट अफिसर जोसेफ लेकक रहेका छन्।

मन्त्री मार्ल्सले यस दुर्घटनाको बारेमा पूर्ण र गहन अनुसन्धान हुने पुष्टि गरेका छन्।

त्यस्तै, अष्ट्रेलियाका प्रधानमन्त्री एन्थोनी अल्बानीजले पीडितका परिवारप्रति संवेदना प्रकट गर्दै हवाइ क्षेत्रमा थप संवेदनशील हुन जरूरी रहेको बताएका छन्।