कार्तिक १०, काठमाडौँ । मुगुमा एकै परिवारका चार जनाको हत्या भएको छ। जिल्लाको छायानाथ रारा नगरपालिका–६ मुन्दु गाउँमा एकै परिवारका चार जनाको सामूहिक हत्या भएको हो। एकै परिवारका २८ वर्षीया श्रीदेवी बोहोरा, ७ महिने छोरा रहर, ८ वर्षीया छोरी छिता र ११ वर्षीय छोरा मनोजको घाँटी रेटेर हत्या गरेको अवस्थामा शव फेला परेको जिल्ला प्रहरी कार्यालय मुगुले जनाएको छ।

घरभित्र हत्या गरिएको अवस्थामा चारैजनाको शव दे‍खेपछि शुक्रबार बिहान ९ बजेतिर छिमेकीले प्रहरीलाई खबर गरेका थिए। अज्ञात समूहले धारिलो हतियार प्रयोग गरी उनीहरूको हत्या गरेको प्रहरीको भनाइ छ।

हत्या भएको खबर पाउन वित्तिकै पिना प्रहरी चौकी र जिल्ला प्रहरी कार्यालयबाट प्रहरी टोली घटनास्थल पुगेको थियो। हत्या गरिएकी महिलाले लगाएको गहना समेत चोरी भएको प्रहरीले बताएको छ। ती महिलाका श्रीमान् एक वर्षदेखि वैदेशिक रोजगारीका लागि खाडी मुलुकमा रहेको बताइएको छ।