माघ १६, मुम्बई । बलिउड फिल्म ‘एक दिवाना था’, ‘सिंह इज ब्लिंग’ जस्ता फिल्मकी अभिनेत्री एमी ज्याक्सनले स्वीटजरल्याण्डको गस्टाडमा इङ्लिस अभिनेता तथा संगीतकार एड वेस्टविकसँग इन्गेजमेन्ट गरेकी छन्। उनले सामाजिक सञ्जालमा तस्वीर सार्वजनिक गर्दै आफू एडसँग इन्गेज्ड भएको जानकारी दिएकी छन्।

तस्वीरमा दुवैजना निकै खुशी देखिएका छन्। एक तस्वीरमा एडले घुँडा टेकेर एमीलाई विवाह प्रस्ताव गरेको देख्न सकिन्छ । एमीले तस्वीरको क्याप्सनमा आफूलाई वेस्टविकसँग इन्गेजमेन्ट गरेको लेखेकी छन्। अभिनेत्रीहरु कियारा आडवाणी, ओरी, आथिया शेट्टी, श्रुति हासन, सोफी चौधरीलगायतले एमीलाई बधाई दिएका छन्।

एमी र एडले स्न २०२२ को जूनमा एक इन्स्टाग्राम पोस्टमार्फत आफूहरुको सम्बन्धको आधिकारिक घोषणा गरेका थिए। एड लोकप्रिय सीडब्ल्यू नेटवर्क सिरिज ‘गसिप गर्ल’मा प्लेब्वाई चक बासका रुपमा परिचित छन्। यो सिरिज सन् २००७ देखि २०१२ सम्म प्रसारण भएको थियो।

उनले सिटकम ‘व्हाइट गोल्ड’मा पनि अभिनय गरेका छन् । एडले अभिनय करियरको सुरुवात सन् २००६ मा ‘चिल्ड्रन अफ मेन’ फिल्मबाट गरेका थिए। एमीको यसअघि होटल व्यवसायी जर्ज पानायटियोउसँग इन्गेजमेन्ट गरेको थियो। उनीहरुको एक छोरा एन्ड्रियास पनि छन्।

एमीले फिल्मी करियरको सुरुवात ‘मद्रासपट्टिनम’ बाट गरेकी थिइन्। उनले सन् २०१२ मा प्रतीक बब्बरका साथ ‘एक दीवाना था’बाट बलिउडमा पाइला चालिन् । उनले ‘येवडू’, ‘आई’, ‘थेरी’, ‘२.०’ जस्ता सुपरहिट फिल्ममा अभिनय गरिन्। सन् २०२४ मा उनी ‘मिसनः च्याप्टर १’मा देखिएकी थिइन् । यसपछि उनी विद्युत जामवाल अभिनित ‘क्रैक’ मा पनि देखिँदैछिन्।