माघ १६, एजेन्सी । कतारका प्रधानमन्त्रीले इजरायल र हमासबीचको युद्धका कारण बनेका बन्धकहरुलाई छिट्टै रिहा गर्ने र युद्धविरामका लागि सकारात्मक समाधान निस्कने विश्वास व्यक्त गरेका छन्। इजरायलले युद्ध सुरु गरेपछि हमासले सयौं यहुदीहरूलाई बन्धक बनाएको बताएको छ। अझै पनि १०० भन्दा बढी इजरायली नागरिक हमासको हिरासतमा छन्।

अमेरिका भ्रमणमा रहेका कतारका प्रधानमन्त्री मोहम्मद बिन अब्दुलरहमान अल थानीले वासिङ्टनमा आयोजित एट्लान्टिक काउन्सिललाई सम्बोधनका क्रममा उनले बाँकी बन्धकहरुको रिहाइ र गाजामा स्थायी युद्धविरामका लागि समाधान खोज्न वार्ता भइरहेको बताएका हुन्।

‘बन्धकहरूको रिहाइ र स्थायी युद्धविरामका लागि केही आधारहरू तयार गरेका छौं, जुन दुवै पक्षलाई स्वीकार्य हुने आशा राख्छौं। तर, बैठकमा प्रस्तावित रूपरेखा हमासलाई बुझाउन बाँकी छ । यद्यपि, हामीलाई थाहा छैन कि हमासले यसबारे कस्तो प्रतिक्रिया दिनेछ।’ कतारका प्रधानमन्त्रीको भनाई थियो।

गत वर्ष अक्टोबर ७ मा इजरायलमा भएको आतंकवादी हमलामा संयुक्त राष्ट्रसंघीय निकायका कर्मचारीको संलग्नता रहेको रिपोर्ट आएपछि गाजाका जनतालाई दिइने अन्तर्राष्ट्रिय सहायता खतरामा परेको छ। इजरायलले संयुक्त राष्ट्रसंघलाई पठाएको प्रतिवेदनमा गाजामा युएनआरडब्ल्यूएका लागि काम गर्ने १९० भन्दा बढी कर्मचारी आतङ्ककारी समूहसँग सम्बन्धित रहेको दाबी गरिएको थियो।