भेनेजुएलाका विपक्षी नेता लोपोल्डो लोपेजलाई करिब १४ वर्षको जेल सजाय सुनाइएको समाचार छ । उहाँलाई शुक्रबार १३ वर्ष ९ महिनाको जेल सजाय सुनाइएको उहाँका वकिल राबेर्टो मर्रेरोले जानकारी दिनुभएको छ । संयुक्त राज्य अमेरिकामा अध्ययन गरेका अर्थशास्त्री लोपेजलाई सन् २०१४ को फेब्रुअरीबाट नै यहाँको सैनिक जेलमा राखिएको जनाइएको थियो । उहाँ भेनेजुएलाका एकजना प्रसिद्ध अर्थशास्त्री पनि हुनुहुन्छ । उहाँलाई सुनाइएको सो जेल सजायको देशव्यापी रुपमा नै व्यापक मात्रामा विरोध भइरहेको पनि बताइएको छ । लोपेजका वकिल मर्रेरोले ट्वीटर एकाउन्टमा लोपेजलाई रमो भेर्डे सैनिक जेलमा राखिएको जनाएका छन् । सो सजाय सुनाइएपछि ४४ वर्षीय लोपेजका समर्थक र सरकार समर्थकबीच अदालत भवनबाहिर झडप भएको जनााइएको छ । लोपेजका समर्थकहरुका अनुसार सो झडपको कारण लोपेजका एक समर्थकको मृत्यु भएको छ । तर यस मृत्युको स्वतन्त्र पुष्टि भने भएको छैन ।