संविधानसभाका अध्यक्ष सुवासचन्द्र नेम्बाङले संविधान जारी नहुँदासम्म संविधानमा हस्ताक्षर गर्न सभासद्लाई आह्वान गर्नुभएको छ । संसद् सचिवालयमा पत्रकारसँग कुरा गर्दै उहाँले संविधानसभा कार्य सञ्चालन नियमावली, २०७० बमोजिम संविधान सार्वजनिक नगर्दासम्म सभासदले चाहँदा संविधानको प्रतिमा हस्ताक्षर गर्न सक्ने भएकाले संविधानमा हस्ताक्षर गर्न आग्रह गर्नुभएको हो । संविधानसभाले शुक्रबार ३ बजेसम्म संविधानमा हस्ताक्षर गर्ने औपचारिक कार्यक्रम राखेको थियो । अध्यक्ष नेम्वाङले भन्नुभयो, “औपचारिक समयमा अनुपस्थित हुने दल र सभासद्लाई भोलि राष्ट्रपति डा रामवरण यादवले संविधान जारी नगर्दासम्म संविधानमा हस्ताक्षर गर्नुस् र संविधानलाई ग्रहण गर्नुस् ।” संविधानसभाले बनाएको संविधानको जगमा उभिएर बाँकी रहेका असन्तुष्टिलाई सम्बोधन गरेर अगाडि बढ्न आग्रह गर्दै उहाँले त्यो नै देश जनताका लागि उपयुक्त हुने बताउनुभयो । अध्यक्ष नेम्बाङले भन्नुभयो, “संविधानसभाबाट पारित संविधान हिमाल, पहाड र तराईका जनताको विजय हो, उहाँको चाहना र भावनाले मूर्तता पाएको छ ।” उहाँले संविधानसभामा रहेका दल, संविधानसभाभन्दा बाहिर रहेका दलहरू र प्रक्रियामा भाग लिई पछिल्लो समयमा बाहिरिनुभएका दलहरू सबैको क्रियाशीलता र मेहनतको परिणाम भएको उल्लेख गर्नुभयो । सबै राजनीतिक दलका नेताले खेलेको भूमिका बारेमा आफू जानकार रहेको बताउँदै अध्यक्ष नेम्बाङले भन्नुभयो, “यो संविधानमा सबै राजनीतिक दलको मेहनत परेको छ ।” संविधानका एक–एक धारा र वाक्यांश हेर्ने हो भने दलहरूका नेताले खेलेको भूमिका झल्कने बताउँदै उहाँले केही विवाद भयो भन्दैमा सिङ्गो संविधानलाई ग्रहण नगर्नेतर्फ जान नहुने बताउनुभयो । संविधान जारी गर्ने भोलिको औपचारिक कार्यक्रमका सबै तयारी पूरा भएको जानकारी दिँदै अध्यक्ष नेम्बाङले सबैलाई उक्त कार्यक्रमा सरिक हुन आह्वानसमेत गर्नुभयो ।