सिड्नीको पारामाट्टामा एक अज्ञात बन्दुकधारीले प्रहरी मुख्यालयमा काम गर्ने एक कर्मचारीलाई भवन बाहिर गोली प्रहार गरी हत्या गरेको छ । गोली प्रहार हुने बित्तिकै प्रहरीको समूहले गोली चलाउँदा निज आक्रमणकारीको पनि ज्यान गएको छ । घटना शुक्रबार अपरान्ह करिब ४ः३० बजेको हो । प्रहरी मुख्यालयमा काम गर्ने एक साधारण कर्मचारी जब भवन बाहिर निस्कदै थिए उक्त बन्दुकधारीले नजिकैबाट गोली प्रहार गरेको थियो । यो घटनालाई प्रहरीले निकै क्रुरतापूर्ण भनेको छ । जब गोलीको आवाज सुनियो तब बाहिर आएका प्रहरी अधिकारीहरुमाथि नै पनि गोली हान्न थालेपछि भएको जवाफी फायरिंगमा आक्रमणकारीको पनि मृत्यु भएको हो । न्यू साउथवेल्सका प्रहरी कमिस्नर एन्ड्रयू सेसीपिनीले पत्रकारहरुलाई भने, आफ्नो ज्यानको समेत परवाह नगरी हाम्रा अफिसरहरुले थप क्षति हुनबाट जोगाएका छन् । मैले पछि घटना सम्बन्धी सीसीटीभी फुटेज हेरेको छु । म यति भन्न सक्छु यो क्रुरतापूर्ण आक्रमण थियो । हाम्रो कर्मचारीको केही दोष थिएन । ऊ काम सकाएर फर्किदै थियो । अपराधीले अन्धुधुन्ध आक्रमण गरेको छ ।

तर, उनले थप स्पष्ट पार्दै भने । अहिले यस क्षेत्र वरिपरिका बासिन्दाले त्रसित हुनुपर्ने कुनै कारण छैन । त्यस्तो कुनै खतरा छैन । घटना आतंकवादसँग सम्बन्धित नभई आपराधिक घटना भएको बताइएको छ ।

घटना भएको पारामाट्टास्थित प्रहरी मुख्यालयको विपरित बस्ने एक प्रत्यक्षदर्शी भन्छन्, म आफ्नै घरमा केही काम गर्दै थिएँ । गोलीको आवाज सुने । मलाई लाग्यो कुनै टायर पञ्चर भयो होला । तर, त्यसपछि फेरि अरु थप दुई फायरको आवाज सुनियो । मैले मेरो श्रीमतीलाई भने कसैले कसैलाई गोली हानेजस्तो छ । यसपछि उसले ढोका खोलेर बाहिर हेरी । उसले त्यहाँ एक व्यक्ति प्रहरीलाई गोली हान्न लागेको अवस्थामा र प्रहरीले त्यसको प्रतिकार गरेको देखी । अर्का प्रत्यक्षदर्शी राज सुध भन्छन्, मैले करिब चारभन्दा बढी फायर भएको सुनें । त्यतिबेला यो के भएको मैले ठम्याउन सकिन । तर पछि थाहा भयो आक्रमणको विषयमा । दिउँसै जब मानिसहरु कार्यालयबाट घर फर्किरहेका थिए यस्तो बेलामा घटना हुनु साँच्चै डरलाग्दो छ ।

यसैबीच, प्रहरीले आज विहान यस घटनाको आक्रमणकारी १५ वर्षीय मध्यपूर्वको पृष्ठभूमि भएको किशोर रहेको सार्वजनिक गरेको छ । उसले आक्रमण गर्नुको कारणका विषयमा प्रहरीले थप अनुसन्धान जारी राखेको जनाएको छ ।