एकीकृत नेकपा (माओवादी)ले उपराष्ट्रपतिका उम्मेदवार नन्दबहादुर पुनको पक्षमा मत मागेको छ । एमाओवादीका अध्यक्ष पुष्पकमल दाहाल, उपाध्यक्ष नारायणकाजी श्रेष्ठ, महासचिव कृष्णबहादुर महरा, सचिव एवम् उपप्रधानमन्त्री टोपबहादुर रायमाझी र उपराष्ट्रपति पदका उम्मेदवार पुनलगायत टोलीले विभिन्न राजनीतिक दलसँग मत मागेको हो । अध्यक्ष दाहाल नेतृत्वको टोलीले मधेसी जनाधिकार फोरम नेपाल (लोकतान्त्रिक) र नेपाल मजदुर किसान पार्टीसँग प्रत्यक्ष भेटघाट गरेर नै पुनका पक्षमा मत मागेको हो । यस्तै राष्ट्रिय प्रजातन्त्र पार्टी, नेकपा (माले), नेकपा (संयुक्त), राष्ट्रिय जनमोर्चालगायत दलसँग पनि मत मागेको एमाओवादी उपाध्यक्ष नारायणकाजी श्रेष्ठले जानकारी दिनुभयो । उपराष्ट्रपति पुनको नेकपा (एमाले)का वरिष्ठ नेता झलनाथ खनाल प्रस्तावक र राष्ट्रिय प्रजातन्त्र पार्टी नेपालका प्रमुख सचेतक दिलनाथ गिरी समर्थक रहनुभएको छ । एमाओवादीले गणतन्त्र प्राप्ति र संविधानसभाका लागि सशस्त्र सङ्घर्षमा महत्वपूर्ण योगदान गरेको व्यक्तित्वलाई उपराष्ट्रपतिमा उम्मेदवार बनाएकाले सहयोगका लागि आग्रह गरेको छ । गणतन्त्र, सङ्घीयता, धर्मनिरपेक्षतालगायत विषयमा महत्वपूर्ण योगदान गरेका व्यक्तिलाई उपराष्ट्रपतिमा विजयी गराएर प्राप्त उपलब्धिलाई संस्थागत गर्न पनि पुनको उम्मेदवारी आवश्यक रहेको एमाओवादीको भनाइ छ । नेकपा(माले)का महासचिव सिपी मैनालीले राष्ट्रपति, सभामुख, प्रधानमन्त्री, उपसभामुख चयन भइसकेका अवस्थामा तराई–मधेस क्षेत्रकै व्यक्तिलाई उम्मेदवार बनाएको भए राम्रो हुने थियो भन्ने पक्षमा आफूहरु रहेको बताउनुभयो । उहाँले सरकार गठनका समयमा कायम भएको गठबन्धनलाई टिकाइराख्न पनि एमाओवादीका उम्मेदवार पुनलाई मत दिइने र विजयी गराइने उल्लेख गर्नुभयो । एमाओवादीले संसद्मा रहेका समाजवादी जनता पार्टी, नेपाली जनता दल, नेपाः राष्ट्रिय पार्टी, खम्बुवान राष्ट्रिय मोर्चा नेपाल, मधेस समता पार्टी नेपाल, दलित जनजाति पार्टी नेपाल, बहुजनशक्ति पार्टी नेपाललगायत दलसँग पनि आफ्ना उम्मेदवारलाई मतदान गर्न आग्रह गरेको छ । उपराष्ट्रपतिको निर्वाचन अहिले बिहान १० बजेदेखि अपराह्न १३ बजेसम्म व्यवस्थापिका–संसद् सचिवालय, निर्वाचन अधिकृतको कार्यालय नयाँ बानेश्वरमा हुने सहायक प्रवक्ता सुदर्शन कुइँकेलले जानकारी दिनुभयो । राष्ट्रपतिको निर्वाचनमा देखिएको केही प्राविधिक समस्यालाई ध्यानमा राख्दै मतदानमा सहज होस् भनेर केही बुथ थप गरिएको उहाँको भनाइ छ ।