प्रहरीको सर्वाधिक खोजीको सूचिमा रहेका देउमान लिम्बु (हाराहाङ्) को नेतृत्वमा रहेको आपराधिक समुह र प्रहरीबीच ताप्लेजुङको सान्थाक्रामा भएको दोहोरो भिडन्तमा एकजनाको ज्यान गएको छ । दोहोरो भिडन्तमा दुई प्रहरी सामान्य घाइते भएका छन् । साँझ करिब ५ बजे जिल्लाकै सान्थाक्रा–६ मा आपराधिक समूहको खोजीमा खटिएको प्रहरी टोलीमाथि हाराहाङसहितको चार÷पाँचजनाको समूहमा रहेको आपराधिक समूहले गोली प्रहार गरेपछि दोहोरो भिडन्त भएको ताप्लेजुङका प्रहरी प्रमुख प्रहरी नायब उपरीक्षक शान्तिराज कोइरालाले जानकारी दिनुभयो । भिडन्तका क्रममा प्रहरीको गोली लागी अपराधिक समूहका एकजनाको घटनास्थलनमानै मृत्यु भएको र उनको साथबाट समिर लिम्बु नाम गरेको नागरिकता फेला परेको कोइरालाले जानकारी दिनुभयो । घटनास्थलबाट प्रहरीले सकेटबम, पाइप बम, कम्ब्याट ड्रेस, बारुद, बिजुलीको तार, रु १४ हजार, ब्याट्री चारथान र झोला फेला पारेको छ ।