नेपालका लागि बङ्गलादेशका राजदूत मास्फी बिन्ते शाम्सले बङ्गलादेशको चटगाउँ र मोङ्गला बन्दरगाह नेपाललाई प्रयोग गर्न अनुमति दिन सकिने बताउनुभएको छ । राजदूत साम्सले मास्फी विन्ते शाम्सले नेपालमा आपूर्ति व्यवस्थापनमा असहज स्थिति पैदा भएपछि एक नेपाली प्रतिनिधिमण्डलले हालै बङ्गलादेशको भ्रमणमा गएको स्मरण गर्दै उक्त कुरा बताउनुभएको हो । बङ्गलादेशको नेपालसँगको सम्बन्ध सौहार्द रहिआएको बताउँदै उहाँले नेपालमा हालै आएको भूकम्पबाट प्रभावितहरूलाई बङ्गलादेश सरकारका तर्फबाट सक्दो सहयोग उपलब्ध गराएको जानकारी दिनुभयो । उहाँका अनुसार नेपालका भूकम्पपीडितलाई एक करोड २० लाख अमेरिकी डलर बराबरको सहयोग उपलब्ध गराइएको थियो । गत वर्ष बङ्गलादेशले ६० लाख अमेरिकी डलर बराबरको विद्युतीय सामग्री, लुब्रिकेन्ट्सलगायतका ४० वटा उत्पादन नेपालतर्फ निर्यात गरेको जानकारी पनि उहाँले दिनुभयो ।