अमेरिकी राष्ट्रपति बाराक ओबामाले बिहीबार वाल्टिमोरमा अवस्थित एक मस्जिदमा गरिएको सभालाई सम्बोधन गर्दै आतङ्कवादसँगको लडाईलाई सफल पार्नु भनेको अमेरिका इस्लाम समुदायप्रति दमनको नीति नलिएको प्रष्ट पार्नसक्नु भएको बताउनुभएको छ । अमेरिकी निर्वाचन अभियानमा मुस्लिमविरोधी मुद्दालाई उठाइएकोमा आलोचना गर्दै उहाँले यसलाई अक्षम्य गतिविधि बताउनुभयो । अमेरिकी राष्ट्रपतिका लागि चुनावी अभियानमा होमिएका बलिया प्रतिस्पर्धी डोनाल्ड ट्रम्पले मुस्लिमहरूलाई अमेरिका प्रवेशमा रोक लगाइनुपर्ने भन्दै हालैका दिनमा दिएका अभिव्यक्ति विश्वभर निकै चर्चाका विषय बनेका छन् । आतङ्कवादलाई परास्त गर्न अमेरिका समग्र इस्लाम धर्मावलम्बीविरोधी नभएको इस्लाम समुदायलाई प्रष्ट्याउन पर्ने उक्त अवसरमा राष्ट्रपति ओबामाले बताउनुभयो ।
क्रिश्चियन धर्मावलम्बीको बहुमत भएको एक अमेरिकी भूभागमा चुनावी प्रचारप्रसारका क्रममा इस्लामविरोधी हालैका राजनीतिक अभिव्यक्तिलाई लिएर उहाँले भन्नुभयो, अमेरिका कुनै धार्मिक अतिवादको पक्षमा रहन सक्दैन । आजको संसारमा कुनै एउटा विश्वासमाथि दमन वा आक्रमण हामीहरूका सबै धार्मिक विश्वासमाथिको आक्रमण हुनेछ, राष्ट्रपति ओबामाको अमेरिकी मस्जिदको पहिलो भ्रमणमा बताउनुभयो । अमेरिकी जनता यदि कुनै धार्मिक समूहमाथि अन्याय भएमा बोल्नुपर्छ । अमेरिकी जनताले धार्मिक स्वतन्त्रतामा विश्वास गर्छन् र यसलाई सम्मान गर्छन् उहाँले थप्नुभयो । आफ्नो सम्बोधनका क्रममा अमेरिकी राष्ट्रपति ओबामाले सबै मुसलमान समुदायलाई अतिवाद र आतङ्कवादलाई अस्वीकार गरी अघि बढ्न आग्रह पनि गर्नुभएको थियो । अमेरिकी मुस्लिम समुदायलाई सम्बोधन गर्दै उहाँले भन्नुभयो, तपाइँहरू मुसलमान वा अमेरिकी नागरिक नभई मुसलमान र अमेरिकी नागरिक हो भन्नुभयो ।