साउन १४, एजेन्सी । मुम्बईस्थित फिल्म सेटमा आगलागी भएको छ। शुक्रबार भएको उक्त आगलागीमा परी एक जनाको मृत्यु समेत भएको भारतीय सञ्चारमाध्यमले उल्लेख गरेका छन्।

श्रद्धा कपुर र रणवीर कपुर स्टारर फिल्मको गीतको छायाङ्कन अंधेरी वेस्टको चित्रकूट स्टुडियोमा भइरहेको थियो। सो क्रममा लव रञ्जनको सेटसँगै राजश्री प्रोडक्सनको सेटमा पनि आगलागी भएको बताइएको छ।

उक्त आगलागीमा परी घाइते भएका मनिष देवासीलाई तत्काल सिभिक रन कुपर अस्पताल लगिएता पनि डाक्टरहरूले मृत घोषित गरेका थिए।

भारतीय सिने कर्मचारी महासंघका महासचिव अशोक दुबेले लभ रञ्जनको सेटमा बत्तीको काम गरिहेका एक व्यक्ति गम्भीर घाइते भएको बताएका छन्। उक्त सेटमा के कारणले आगलागी भएको हो भन्ने खुल्न नसकेको बताइएको छ।