हरेक वर्ष नेपालीहरुको मुख्य चाडको अवसरमा काँग्रेसले आयोजना गर्ने चियापान यस वर्ष पनि आयोजना गरिएको छ । पार्टी केन्द्रीय कार्यालय, सानेपामा दिउँसो १ बजेदेखि शुभकामना आदानप्रदान एवम् चियापान कार्यक्रम आयोजना भएको थियो । कार्यक्रममा नेपाली काँग्रेसका सभापति एवम् प्रधानमन्त्री सुशील कोइराला, उपसभापति रामचन्द्र पौडेल, उपप्रधानमन्त्री एवम् पार्टीका महामन्त्री प्रकाशमान सिंह, अर्का महामन्त्री कृष्णप्रसाद सिटौलालगायतका नेताहरूले कार्यक्रममा सहभागी विभिन्न राजनीतिक दलका नेता तथा कार्यकर्ताहरूलाई पार्टीका तर्फबाट शुभकामना प्रदान एवम् स्वागत गर्नुभयो । कार्यक्रममा नेकपा (एमाले)का वरिष्ठ नेता एवम् पूर्व प्रधानमन्त्री माधवकुमार नेपाल, उपाध्यक्ष एवम् उपप्रधानमन्त्री वामदेव गौतम, मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदार, मधेसी जनअधिकार फोरमका अध्यक्ष उपेन्द्र यादवलगायतका नेताहरू सहभागी भइसक्नुभएको छ ।