जिका भाइरसको संक्रमण सोचिएभन्दा निकै डरलाग्दो भएको अमेरिकी स्वास्थ्य अधिकारीहरुले बताएका छन् । अधिकारीहरुले शुरुमा जिकाको संक्रमण जस्तो हुने भनेर अनुमान  गरिएको थियो, वास्तविकता त्यो भन्दा निकै भयावक रुपमा आएको बताएका हुन् ।

पछिल्लो पटक जन्मिएका शिशुमा जिका भाइरसका कारण हुने जन्मजात समस्याको दर बढेको अमेरिकाको रोग नियन्त्रण तथा सावधानी केन्द्रकी चिकित्सक डाक्टर एन्नी सचाटले बताउनुभयो । जिका भाइरसको संक्रमण फैलाउन एडिस एजिप्टाइन जातको लामखुट्टे पनि पहिले अनुमान गरिएभन्दा धेरै राज्यमा फैलिएको उहाँले बताउनुभयो ।

झन्डै एक वर्षअघि ब्राजिलबाट शुरु भएको जिका भाइरसको संक्रमण दक्षिण अमेरिका तथा क्यारेवियनसहित, अमेरिका, बेलायत, दक्षिण कोरिया र चीनसम्म फैलिएको छ । दक्षिण अमेरिकामा जिका भाइरसका कारण हजारौं बालबालिकामा जन्मजात विभिन्न समस्या देखिएको छ ।

यसका कारण विशेष गरी बालबालिकाको मष्तिस्कमा असर पर्ने गर्दछ । यसले गर्दा टाउकाको माथिल्लो भाग सानो भएको बच्चा जन्मने गरेको छ । अहिलेसम्म जिकाका बारेमा भएको गरेका काम तथा जानेका कुरा पर्याप्त नभएको डाक्टर सचाटको भनाइ छ ।

जिका भाइरसविरुद्ध लड्नका लागि अहिले छुट्याइए भन्दा धेरै पैसा, समय र अनुसन्धान खाँचो रहेकोमा चिकित्सकहरुले जोड दिएका छन् । अमेरिकी राष्ट्रपति बाराक ओबामाले जिकाविरुद्ध लड्नका लागि आपतकालीन कोषमा १ अर्ब ८० करोड डलर राख्न कांग्रेससँग आग्रह गर्नुभएको थियो ।