पुस ९, मुम्बई । अभिनेत्री उर्वशी रौतेला चर्चा पाउनका लागि कुनै पनि कसर बाँकी राख्दिनन्।

चाहे त्यो स्टार भारतीय क्रिकेटर ऋषभ पन्तका साथ उनको अफवाहवाला दुश्मनी होस् या आफ्नो पहिरनको महंगो मूल्य। कुनै न कुनै कारणले उनी समाचार बनिरहन्छिन्। हालैमात्र उनी पुनः चर्चामा आएकी छन्। उनले नेटफ्लिक्सको एनुअल भिडियोमा आफ्नो केही सेकेण्ड उपस्थितिका लागि १५ करोड रुपैंयाँ पारिश्रमिक बुझेकी छन्।

नेटफ्लिक्सले हालैमात्र यो वर्ष रिलिज भएका आफ्ना भारतीय शो र फिल्मको एक स्पुफ भिडियो पोस्ट गरेको थियो। जसमा उर्वशी भीएफएक्सको माध्यमले रयान गोस्लिङका साथ लामो श्वास फेर्दै गरेको देख्न सकिन्छ।

उनी हलिउड स्टारलाई आफ्नो हत्केला देखाउँछिन्, जहाँ आरपी लेखिएको हुन्छ। जसलाई उनी हटाएर आरजी अर्थात् रयान गोसलिङमा परिवर्तन गर्छिन्। यही उपस्थितिका लागि उनले १५ करोड पारिश्रमिक लिएकी हुन्। तर उर्वशीले भने यो पारिश्रमिकका विषयमा मुख खोलेकी छैनन्।