ब्रिटिश एयरवेजको विमानमा ड्रोन ठोक्कियो !
ब्रिटिश एयरवेजको एउटा विमानमा मानवरहित विमान (ड्रोन) ठोक्किएको छ । बेलायतकै हिथ्रो विमानस्थलको टर्मिनल ५ मा अवतरण गर्नु केही अघि उक्त विमानमा ड्रोन ठोक्किएको हो ।
१ सय ३२ यात्रु र चालक दलका पाँच सदस्य सवार सो विमान अवतरणको तयारीमा रहँदा आकाश मै ड्रोनसँग ठोक्किएको हो । यद्यपी कुनै प्रकारको क्षति विना नै सो विमान अवतरण गर्न सफल भएको जनाइएको छ ।
जेनेभाबाट लन्डन आएको सो विमान अवतरण गर्नुभन्दा केही मिनेट अघि ड्रोनमा ठोक्किएको हो ।
बेलायतमा ड्रोनको अवैध उडान ठूलो समस्या बन्दै आएको छ । २५ पाउन्डदेखि २० हजार पाउन्ड मूल्यसम्मका ड्रोन बजारमा उपलब्ध भएका कारण गैर व्यावसायिक तथा अनधिकृत रुपमा ड्रोन उडाउनेको संख्या पनि बढ्दो रहेको अधिकारीहरु बताउँछन् ।
