एक वर्ष अघि नेपालमा गएको विनाशकारी भूकम्पको क्रममा दिवंगत हुनुभएकाहरुको आत्माको शान्ति कामना गर्दै उनीहरुको स्मरणमा दिप प्रज्वलन गरेर कार्यक्रम गर्ने क्रममा सिड्नीको एसफिल्डमा पनि शान्ति कामना गरिएको छ ।
नेपलिज युथ एसोसियसन अष्ट्रेलिया (नया) र लाहुरी ग्रुपको सयुक्त आयोजनामा सिड्नीको यशफिल्ड पार्कमा यस्तो दीप प्रज्वलन र शान्तिकामना कार्यक्रम गरिएको हो । उक्त अवसरमा एनआरएनका अध्यक्ष सुरेन्द्र सिग्देल अतिथिको रुपमा उपस्थित हुनुहुन्थ्यो । करिब २ सयभन्दा बढी नेपाली समूदायका सदस्यहरुको उपस्थितिमा भएको कार्यक्रममा सिग्देलले बोल्दै दिवंगतहरुको आत्मशान्तिको कामना गरेका थिए । उनले भूकम्पको केन्द्रविन्दु गोर्खाको वापारभन्दा माथि लाप्राकमा एनआरएनले नमूना बस्ती बनाउने परियोजना अगाडि बढेको र नेपाल सरकारले नमुना बस्ती निर्माण गर्न स्वीकृति दिएको जानकारी दिएका थिए । एनआरएनका ओसेनिया क्षेत्रीय संयोजक महेन्द्र कुमार लम्सालले भुकम्प पीडितहरुको लागि एनआरएनले छिटोभन्दा छिटो नमूना वस्ती निर्माण गर्ने बताएका थिए । कार्यक्रममा नयाका अध्यक्ष कोमल राज पाठकले त्यो कालो दिनको स्मरण गर्न नचाहे पनि त्यसमा दिवंगत भएकाहरुको सम्झनामा र फेरि यस्तो नहोस् भन्ने कामनाका साथ कार्यक्रम राखिएको भन्दै उपस्थित सबैलाई धन्यवाद ज्ञापन गरेका थिए । नयाका सल्लाहकार  भिष्म भण्डारीले सन्चालन गर्नु भएको दीप प्रज्वलन कार्यक्रममा मैनबत्ति बालेर नेपालको नक्सा र धरहराको प्रतिक बनाइएको थियो ।