सरकारले नेपाल पत्रकार महासंघका दुई पूर्वसभापति र एक पूर्वमहासचिवलाई वरिष्ठ पत्रकार सम्मान दिएको छ । ‘वरिष्ठ पत्रकार सम्मान–२०७२’ पाउनेमा महासंघका पूर्वसभापतिहरु डा. सुरेश आचार्य र शिव गाउँले र तथा महासंघका पूर्व महासचिव ओम शर्मा हुनुहुन्छ ।

त्यस्तै ‘राष्ट्रिय पत्रकारिता पुरस्कार–२०७२’ ‘जनआस्था’का सम्पादक किशोर श्रेष्ठलाई प्रदान गरिएको छ । ती सम्मानका साथ जनही दुई लाख रुपैयाँ छ ।

राष्ट्रपति विद्यादेवी भण्डारीले काठमाडौंमा आयोजित कार्यक्रममा सो सम्मान दिँदै सरकारले पत्रकारलाई गरेको सम्मानले सिङ्गो पत्रकारितालाई अझै समृद्ध बनाउन सहयोग पुग्ने विश्वास व्यक्त गर्नुभयो । राष्ट्रपतिले सरकार र पत्रकारिता क्षेत्रको समन्वय हुनुपर्नेमा जोड दिनुभयो ।

सरकारका मुख्य सचिव डा सोमलाल सुवेदीले संविधान कार्यान्वयनसँगै सङ्घीय लोकतान्त्रिक गणतन्त्रलाई संस्थागत गर्न मिडियाको अत्यन्त महत्वपूर्ण भूमिका हुने बताउनुभयो ।

सूचना तथा सञ्चार मन्त्रालयका सचिव दिनेशकुमार थपलियाले सरकारले पछिल्लो पटक सञ्चारगृहलाई उद्योगका रूपमा मान्यता दिने, श्रमजीवी पत्रकारको न्यूनतम पारिश्रमिक लागू गर्ने र अनलाइन निर्दे्शिका ल्याउने लगायत काम गरेको जानकारी दिनुभयो ।

सम्मानितका तर्फबाट पत्रकार डा आचार्यले नेपाली पत्रकारिता क्षेत्रलाई अझै व्यावसायिक र संस्थागत बनाउनुपर्नेमा जोड दिनुभयो । रासस