सिड्नीमा भएको डरलाग्दो दुर्घटनामा एक व्यक्तिको मृत्यु
वैशाख ३, मेलबर्न, अष्ट्रेलिया । सिड्नीको पश्चिमी उपनगरमा शनिबार भएको डरलाग्दो सवारी दुर्घटनामा एक जनाको मृत्यु भएको छ भने अर्का एकजना अस्पतालमा भर्ना भएका छन्।
हुण्डाई आइ-२० र होल्डन युट ठोक्किएपछि शनिबार बेलुका ५ बजेपछि मेरिल्याण्ड्सको हक्सभ्यू स्ट्रिटमा आपतकालिन टोलीलाई बोलाइएको थियो।
होल्डनमा यात्रा गरिरहेका ३५ वर्षीय पुरूषको मृत्यु भएको बताइएको छ। घटनास्थलमा पुगेको प्यारामेडिकहरूको प्रयासको बाबजुद उनको सोही ठाउँमा मृत्यु भएको हो।
सामान्य चोटपटक लागेका २३ वर्षीय चालकलाई भने अनिवार्य परीक्षणका लागि अस्पताल लगिएको छ। हुण्डाईका ३७ वर्षीय चालक चमत्कारी ढंगले जोगिएका छन् र उनको पनि वेस्टमीड अस्पतालमा परीक्षण गरिएको छ।
