मेलबर्नको सडकमा आफ्नो कार भित्र घाइते अवस्थामा भेटिएका पुरूषको मृत्यु
वैशाख २५, मेलबर्न, अष्ट्रेलिया । मेलबर्नको उत्तर-पश्चिममा आइतबार राति आफ्नो कार भित्र गम्भीर चोटपटक लागेको अवस्थामा भेटिएका एक व्यक्तिको मृत्यु भएको छ।
उनको मृत्यु भएसँगै हत्या अनुसन्धानकर्ताहरूले घटनास्थलको अनुसन्धान गरिरहेका छन्। यो घटना सोही सडकको अर्को ठाउँमा भएको हत्यासँग जोडिएको हुनसक्ने उनीहरूले अनुमान गरेका छन्।
आइतबार राति ११.३० बजेपछि टेलर हिलको भाउक्लुज ब्लभिडीमा पार्किङ गरेको कारभित्र ती व्यक्ति गम्भीर घाइते अवस्थामा फेला परेका थिए।
“एम्बुलेन्स चालकहरूले घटनास्थलमा व्यक्तिको उपचार गरे तर उनलाई बचाउन सकेनन्,” भिक्टोरिया प्रहरीका एक अधिकारीले भनेका छन्।
सोही सडकको करीब ५०० मिटर तल एक कार रूखसँग ठोक्किएर दुर्घटना हुँदा एक व्यक्तिको मृत्यु भएको छ। सोही दुर्घटनामा यो हत्या पनि जोडिएको हुनसक्ने शंका सहित अनुसन्धान सुरू भएको छ।
प्रहरीले इलाकाका बासिन्दाहरूसँग सोधपुछ गरिरहेको छ। कसैलाई घटनाबारे जानकारी भए क्राइम स्टपरसँग सम्पर्क गर्न आग्रह गरिरहेको छ।
