नेप्लीज एशोसिएसन अफ भिक्टोरिया न्याभले आफ्ना नयाँ पदाधिकारी र नेपाली समाजका अगुवाहरुबीच अन्तरक्रिया कार्यक्रम सम्पन्न गरेको छ । कोबर्गस्थित लाईब्रेरीको हलमा आइतबार सम्पन्न भएको चियपान तथा अन्तरक्रिया कार्यक्रममा संस्थाका अध्यक्ष डा. अनुपम पोखरेलले पदाधिकारीहरुको परिचय गराएका थिए । पोखरेलले उक्त अवसरमा संस्थाले गठन गरेका विभिन्न विधाका कमिटीका साथै आगामी दिनका योजनाहरु पनि प्रस्तुत गरेका थिए । आइतबार दिउँसो २ बजदेखि ४ बजेसम्म २ घण्टा आयोजना गरिएको अन्तरक्रिया कार्यक्रममा भिक्टोरियाका लागि अवैतनिक महावाणिज्यदुत चन्द्र योञ्जन, एनआरएन भिक्टोरियाका संयोजक केशव कँडेल, न्याभका  पूर्वअध्यक्षहरु रञ्जन वैद्य, राजु अधिकारी, बम योञ्जन, सुधिर शाक्य लगायत, पूर्व पदाधिकारीहरु पनि उपस्थित थिए । यस्तै भिक्टोरियामा रहेका विभिन्न संघ संस्थाका प्रतिनिधिहरुको समेत उपस्थितिमा भएको कार्यक्रममा परिचय पश्चात उपस्थित व्यक्तित्वहरुले आगामी दिनमा न्याभले खेल्नुपर्ने भूमिका, संस्थाका चुनौती लगायतका विषयमा आफ्ना सुझावहरु प्रस्तुत गरेका थिए ।