जेठ २९, मेलबर्न, अष्ट्रेलिया । अष्ट्रेलियाको न्यु साउथ वेल्समा भएको गाडी दुर्घटनामा परि १० जनाको मृत्यु भएको छ।  सोही दुर्घटनामा ११ जना घाइते भएपछि प्रहरीले ५८ वर्षीय गाडी चालकलाई नियन्त्रणमा लिएको छ।

न्यु साउथ वेल्सको हन्टर क्षेत्रमा विहेमा जाने मानिसहरू बोकेको बस स्थानीय समय अनुसार आइतबार राती ११ः ३० बजे दुर्घटनामा परेको थियो।

कार्यवाहक सहायक आयुक्त ट्रेसी चैपम्यानले सोमबार बिहान पत्रकार सम्मेलन गरी सवारी चालक नियन्त्रणमा रहेको पुष्टि गरेका छन्।

सिड्नीबाट ३ तीन घण्टा उत्तरमा पर्ने वाईन उध्योग रहेको हन्टर भ्यालीमा मध्यराती गाडी दुर्घटना भएपछि आपतकालीन सेवाहरूलाई बोलाइएको थियो। दुर्घटनामा परेका व्यक्तिहरूको उद्धारका लागि हेलिकप्टर समेत प्रयोग गरिएको थियो।

विशेषज्ञ फरेन्सिक पुलिस र दुर्घटना अनुसन्धान इकाईले घटनास्थलको अनुसन्धान गर्ने बताइएको छ।

दुर्घटनामा चालकलाई गम्भीर चोट लागेन र अस्पतालबाट डिस्चार्ज भएपछि सेसनक प्रहरी चौकीको टोलीले पक्राउ गरेको थियो।

प्रधानमन्त्री एन्थोनी अल्बानीजले ट्वीटरमा भयानक दुर्घटनामा मृत्यु भएका व्यक्तिका प्रियजनहरूप्रति सहानुभूतिको सन्देश पोस्ट गरेका छन्।