असार २७, मेलबर्न, अष्ट्रेलिया । मेलबर्नको वेस्ट गेट ब्रिजमा गुडिरहेको बसमा आगो लागेको छ। गुडिरहेको बस आगोबाट ध्वस्त हुँदा गाडीमा सवार तीन जना भने सकुशल रहन सफल भएका छन्।

फायर रेस्क्यू भिक्टोरियालाई सोमबार साँझ ५ः ५० बजे पोर्ट मेलबर्नमा आगलागी भएको रिपोर्ट गरेर बोलाइएको थियो। उद्धार टोली आठ मिनेट पछि पुग्दा बस पूर्ण रूपमा जलेको फेला पारेको थियो।

डिजेलबाट चल्ने सार्वजनिक यात्रुवाहक बसको इन्जिनबाट सल्किएको आगो निभाउन करीब ३० मिनेट नै लागेको थियो।

बसमा चालक र दुईजना यात्रुसहित तीनजना सवार रहेको र उनीहरू सकुशल रहेको प्रहरीले जानकारी दिएको छ। प्रहरीले उक्त घटना पूर्ण रूपमा नियन्त्रणमा लिनका लागि वरिपरीको आवत जावत पूर्ण रूपमा बन्द गरेको थियो।

थप ट्राफिक लेनहरू खोल्न स्थानीय समय साँझ ७ः ३० बजे बसलाई फ्रीवेबाट सारिएको थियो। सामाजिक सञ्जालमा शेयर गरिएको भिडियोहरूमा गाडीमा आगोले पूरै जलेको देखिएको छ।

प्रहरीले अहिलेको अवस्थालाई शंकास्पद नमानेको बताइएको छ।