अखिल नेपाल फुटबल संघ (एन्फा)ले पुनर्बहाली गर्ने निर्णय भएका तीन उपाध्यक्षलाई शुक्रबार पदस्थापन गराएको छ ।

ललिपुरस्थित एन्फा कम्प्लेक्समा सम्पन्न कार्यसमिति बैठकमा कर्मा छिरिङ शेर्पा, विजयनारायण मानन्धर र किशोर राईलाई उपाध्यक्षमा र पंकजविक्रम नेम्वाङलाई सदस्यमा पदस्थापन गरिएको हो ।

विश्व फुटबल महासंघ (फिफा)ले पुनर्बहाली गर्न दिएको निर्देशनबमोजिम उनीहरुलाई एन्फाले गत बुधबार मात्र पुनर्बहाली गर्ने निर्णय गरेको थियो ।

एन्फाले उनीहरुलाई गत असोज ११ गते बर्खास्त गरेको थियो । तीन उपाध्यक्ष र एक सदस्यको पुनर्बहालीसँगै उनीहरुको ठाउँमा नियुक्त भएकाले भने राजीनामा दिएका छन् । उपाध्यक्ष मणि कुँवर, सन्तोष बानियाँ र वीरबहादुर खड्का तथा सदस्य अरुणमान जोशीले राजीनामा दिएका हुन् ।

राजीनामा स्वीकृत गर्दै एन्फाले बानियाँलाई मानार्थ उपाध्यक्ष र जोशीलाई मानार्थ सहस्य मनोनित गरेको छ । कुँवर र खड्कालाई सहायक महासचिव मनोनीत गरिएको एन्फाले जनाएको छ । यसैबीच एन्फाको बैठकले पुनर्बहालीपछि अदालतमा चलिरहेको मुद्दा फिर्ता लिन आग्रहसमेत गरेको छ ।

त्यस्तै एन्फाको बैठकले गत वर्षको भूकम्पपछि दुर्घटनामा परी निधन भएका तत्कालिन कावा अध्यक्ष लतितकृष्ण श्रेष्ठको अर्धकदको सालिक एन्फा परिसरमा यही जेठ २९ गते स्थापना गर्ने निर्णय गरेको छ ।

बैठकले यीसँगै सातभन्दा बढी महत्वपूर्ण निर्णय गरेको एन्फाका प्रमुख कार्यकारी अधिकृत तथा प्रवक्ता इन्द्रमान तुलाधरले जानकारी दिनुभयो । रासस