युरो कपअन्तर्गत समूह बी अन्तरगत बुधबार भएको खेलमा स्लोभाकिया विजयी भएको छ । स्लोभाकियाले रसियालाई २–१ गोलले पराजित गरेको छ ।

स्लोभाकियाका लागि खेलको ३२ औं मिनेटमा भ्ल्यालिमिर विसले गोल गर्दै अग्रता दिलाए । यस्तै खेलको ४५ औं मिनेटमा ह्यामसिकले गोल गर्दै अग्रता दोब्बर पारे । रसियाका लागि ग्लुसाकोभले ८० औँ मिनेटमा गोल गर्दै केही आशा जगाएका थिए । खेलको अन्तिम समयतिर रसियाले स्लोभाकियालाई केही दवावमा राखे पनि थप गोल गर्न सकेन ।

खेल सुरु हुनुअघि रसियाका कोच लियोनल्ड लुतस्कीले इंग्ल्याण्डसँग जस्तै खेल प्रदर्शन गरे स्लोभाकियालाई हराउन सकिने बताएका थिए । स्लोभाकियाका कोच जान कोज्याकले आफूहरुले वेल्ससँगको खेलमा पाएका अवसरहरु सदुपयोग गर्न नसक्दा हार्नु परेको तर रसियासँग त्यो गल्ती नदोहो¥याउने बताएका थिए । कोज्याकले भने जस्तै स्लोभाकियाले पाएका केही अवसर सदुपयोग गरेर रसियामाथि २–१ को जित निकाल्यो । रसियाले आफ्नो पहिलो खेलमा इंग्ल्याण्डसँग १–१ गोलको बराबरी खेलेको थियो । यस्तै स्लोभाकिया पहिलो खेलमा वेल्ससँग २–१ गोल अन्तरले पराजित भएको थियो ।