मंसिर २४, मेलबर्न, अष्ट्रेलिया । अष्ट्रेलियाको राजधानी सहर एसिटी र काठमाडौँ महानगरपालिकाबीच भगिनी सम्बन्ध स्थापनाको पहल थालिएको छ।

हालै अष्ट्रेलिया सरकारको निम्तोमा गएकी काठमाडौँ महानगरपालिकाकी उपमेयर सुनिता डङ्गोल र एसिटीका मुख्यमन्त्री एन्ड्रीयु जेम्स बार्रबीच भएको वार्तापछि यसबारे प्रक्रिया अघि बढाइएको हो।भेटमा एसीटी महिला योजना २०१६(२०२६ बारे पनि छलफल भएको उपमेयर डङ्गोलले जानकारी दिइन्।

अष्ट्रेलिया सरकारको वैदेशिक मामिला मन्त्रालय र नेपालस्थित अस्ट्रेलियन दूतावासको संयुक्त निमन्त्रणमा विशेष भ्रमण पूरा गरी डङ्गोल स्वदेश फर्किसकेकी छन्। त्यसक्रममा उनले सिड्नी, क्यानबेरा, होबर्ट र मेलबर्न सहरहरूको भ्रमण भ्रमण र विभिन्न कार्यक्रममा सहभागी भएकी थिइन्।

खनिज तथा उर्जा, कृषि पर्यटनलगायतको अवलोकन भ्रमणका लागि मंसिर ८ गते उनी त्यसतर्फ गएकी थिइन्। डङ्गोलले भ्रमणका क्रममा अष्ट्रेलियाली प्रधानमन्त्री तथा मन्त्रिपरिषद् विभाग, सामाजिक नीति तथा महिला अन्तराष्ट्रिय संलग्नता शाखाका प्रमुख रोचेल हवाईसँग भेट गरिन्।

उक्त भेटमा महिला समावेशिता, संलग्नता र सशक्तीकरण सम्बन्धी कार्यक्रम, विभिन्न क्षेत्रहरूमा महिलाहरूको सहभागिता र लैङ्गिक विषयवस्तुको सुधारबारे छलफल भएको उनले बताइन्। सन् २०१७ पछि सम्भवतः पहिलो पटक यसरी जनप्रतिनिधिलाई विशेष महत्त्व दिएर बोलाएको उक्त भ्रमणका क्रममा मानव संशाधन, लैङ्गिक समानता, आधुनिक दासप्रथा विरुद्धको अभियानलगायतका कार्यक्रममा उनी सहभागी थिइन्।

त्यसका लागि सम्भावित साझेदारी र समन्वय गर्न अष्ट्रेलियाली अन्तराष्ट्रिय मामिला तथा व्यापार विभागका वरिष्ठ अधिकृत ग्यारी कोवेनसँग पनि भेट भएको उनले बताइन्। भेटमा अस्ट्रेलियामा आदिवासी जनजातिको ज्ञान, सीप, मूल्य र मान्यतालाई संरक्षण, संवर्द्धन र प्रवर्द्धन कसरी गरिएको रहेछ भने ज्ञान आदानप्रदान गरिएको उनको भनाइ छ।

भ्रमणका क्रममा न्यू साउथ व्हेल्सका आर्ट ग्यालरीहरुसँग बैठक र अवलोकन भएको थियो भने उक्त भेटमा ऐतिहासिक र सांस्कृतिक महत्त्व बोकेको मूर्ति तथा अमूर्त सांस्कृतिक सम्पदा फर्काउने टोलीसँग पनि भेट भएको थियो।

भ्रमणका सिलसिलामा अष्ट्रेलियाली राष्ट्रिय पुँजी प्राधिकरणका कार्यकारी निर्देशक स्याली बार्नेससँग पनि उपमेयर डङ्गोलले भेट गरेकी थिइन्। भेटमा सहरी योजनाको प्राथमिकताहरूको प्रभावकारी ढङ्गले पहिचान गर्ने पद्धति,सहरी विकासका लागि रणनीतिक मार्ग, समावेशी र दिगो समुदायको विकासबारे सम्भावित कार्यक्रम, योजनातर्जुमा र सम्भावित साझेदारीबारे छलफल भएको उनले बताइन्।