मेलबर्नको रिजर्भोयर क्षेत्रमा शनिबार दिउँसै डकैती भएको छ । तीनजनाको संख्यामा आएका लुटेराहरुले एक गहना पसलबाट हजारौं डलर नगद र गहनाहरु लगेका छन् । दिउँसो ३ः१० बजेको समयमा पसलमा आएका उनीहरुले अनुहार छोपेका थिए । प्रहरीले पसलमा डकैती भएको बेलाको सीसीटीभी फुटेज र फोटो सार्वजनिक गर्दै यस विषयमा सूचना भएमा तुरुन्त सम्पर्क गर्न सर्वसाधारणलाई अनुरोध पनि गरेको छ । शनिबार दिउँसो उनीहरुले पसलमा प्रवेश गरी हतियार देखाएर लुटपाट मच्चाएका थिए । एक कर्मचारीलाई पेस्तोल देखाएर गहना राखिएको क्याविनेट फुटाएका थिए । त्यस्तै सेफमा रहेको नगद पनि उनीहरुले कब्जामा लिएका थिए । भिक्टोरिया प्रहरीले यस घटनामा संलग्नहरुको खोजी अघि बढाएको र अनुसन्धान तिव्र पारिएको जनाएको छ ।