जेठ ८, काठमाडौं । आफूविरुद्ध पक्राउ पुर्जी जारी गरिनुलाई कान्तिपुर मिडिया ग्रुपका अध्यक्ष कैलाशप्रसाद सिरोहियाले समाचार रोक्न राज्य शक्तिको दुरुपयोग गर्दै विषयान्तरको दबाबका रुपमा लिएका छन्।

नागरिकताका विवरण फरक रहेको समाचार आइरहँदा सिरोहियालाई पक्राउ गर्न धनुषा जिल्ला अदालतले सोमबार प्रहरीलाई अनुमति दिएको हो। जिल्ला अदालत धनुषाका न्यायाधीश चित्रबहादुर गुरुङको इजलासले नागरिकता किर्ते प्रकरणमा सिरोहियालाई पक्राउ गरि अनुसन्धान गर्न अनुमति दिएको धनुषा प्रहरीले जनाएको छ।

सिरोहियाको नागरिकताबारे केही सञ्चारमाध्यममा समाचार आएका थिए। उनले सञ्चालन गर्दै आएका कम्पनीपिच्छे अलग अलग नागरिकता नम्बर प्रयोग गरेको भन्दै समाचार प्रकाशन भएपछि धनुषा प्रहरीले अनुसन्धान थालेको थियो।

सिरोहियाका बाबु घासीराम माडवारी अंगीकृत नागरिक भए पनि सिरोहियाले भने वंशजको नागरिकता प्रमाण नै सार्वजनिक भएका थिए। कान्तिपुर पब्लिकेसन्सका अध्यक्ष समेत रहेका कैलाश सिरोहियाले नागरिकताको विषयमा जिल्ला अदालत धनुषाबाट जारी पक्राउ पुर्जीलाई संस्थासँग जोडेका छन्।

कान्तिपुर दैनिकले सहकारीको रकम अपचलन आरोपमा उपप्रधान एवं गृहमन्त्री रवि लामछिानेलाई छानबिनको दायरामा ल्याउन दबाब पुग्नेगरि लगातार समाचार प्रकाशित गर्दै आएको छ । पक्राउ पुर्जी जारी हुनुलाई समाचार रोक्ने नियत रहेको सिरोहियाको ठहर छ।

विज्ञप्ति जारी गर्दै सिरोहियाले कान्तिपुरमा प्रकाशित समाचारलाई लिएर सरकारले राज्य शक्तिको दुरुपयोग गरेको प्रतिक्रिया दिएका छन्। ‘सहकारीका ७१ लाख सदस्य तथा बचतकर्ताको पसिनाको कमाइ सुरक्षित गर्न यसमा ठगी गर्नेहरूमाथि अनुसन्धान र कारबाही हुनुपर्ने आवाज उठाउनु कुनै पनि सञ्चारमाध्यमको जिम्मेवारी हो। कान्तिपुरको समाचार रोकाउन ब्ल्याकमेलिङ गर्न र मूल मुद्दा विषयान्तर गर्न मेराविरुद्ध आफैं उजुरी गर्न लगाएर, सोधपुछसमेत नगरी पक्राउ पुर्जी जारी गर्ने हर्कत गरिएको हो भन्नेमा शंका छैन,’उनको विज्ञप्तिमा छ।

कान्तिपुरको समाचार रोक्ने ब्ल्यामेलिङ गर्न र मूल मुद्दा विषयान्तर गर्न आफूविरुद्ध पक्राउ पुर्जी जारी गरिएको सिरोहियाको भनाइ छ। सिरोहियालाई कांग्रेसको साथ कान्तिपुर मिडिया ग्रुपका अध्यक्ष सिरोहियालाई भेट्न थापाथलीस्थित कार्यालयमा प्रमुख प्रतिपक्षी नेपाली कांग्रेसका नेताहरूको लस्कर लागेको छ।

नागरिकता किर्ते प्रकरणमा जिल्ला अदालत धनुषाबाट मंगलबार पक्राउ पुर्जी जारी भएपछि कांग्रेसका झण्डै दर्जन बढी नेताहरू थापाथलीस्थित कान्तिपुर मिडिया ग्रुपको कार्यालयमा पुगेर सिरोहियासँग संवाद गरेका हुन्।

सिरोहियालाई भेटेर फर्किएका कांग्रेस नेता रामहरि खतिवडाले आफूसहित करिब २० जना सांसदहरू त्यहाँ पुगेको पुष्टि गरे। उनले पूर्व परराष्ट्रमन्त्री एनपी साउदसँगै सांसदहरू दीपक गिरी, वीरबहादुर बलायर, प्रतिमा गौतम, रामनाथ अधिकारी, राजु थापा, चन्दा चौधरी र राजेन्द्र बजगाईँलगायत नेताहरू सिरोहियालाई साथ दिन पुगेको पनि बताए।

यसअघि कांग्रेसले मंगलबारको प्रतिनिधि सभा बैठकमा समेत सिरोहियाविरुद्ध प्रतिशोध लिइएको भन्दै आपत्ति जनाएको थियो।