सिड्नी निवासी क्यान्सर पीडित नेपाली चेली मनिषा स्यांग्बोको सहयोगका लागि मंगलबार सिड्नीको ग्रानभिलस्थित हिमालयन रेष्टुरेन्टमा गायिका निकी कार्कीसँग मिट एण्ड ग्रिट कार्यक्रम आयोजना हुने भएको छ । मिट एण्ड ग्रिटबाट संकलित सबै रकम मनिषाको उपचारका लागि बनाइएको कोषमा खर्च गरिने भएको छ । यस कार्यक्रमको संयोजन गरिरहेकी एनआरएन अष्ट्रेलियाकी उषा बारियाले नेपाली चेली मनिषालाई अनलाईन सहयोग मार्फत ५ हजार संकलन भएको र अझै २५ हजार थप रकम आवश्यक भएकोले कार्यक्रम गर्न लागिएको बताउनुभयो । सन् २००९ मा अष्ट्रेलिया आएकी मनिषा यतिबेला क्यान्सर देखिएपछि उपचारको क्रममा वेष्टमिड अस्पताल भर्ना भएकी छिन् । उनी परिवारको जेठी छोरी हुन् । उनको हेल्थ कभरले किमोका निम्ति रकम उपलब्ध नगराउने भएपछि यतिबेला सहयोग संकलन थालिएको हो । पहिलो किमो गत अगष्ट एघारमा गरिएको र अझै ७ वटा किमो बाँकी नै रहेको बारियाले एमएनटीभीलाई जानकारी दिनुभयो । बारियाले एमएनटीभीसँग कुरा गर्दै भन्नुभयो, “हामीले यसअघि पनि साथीभाईलाई यस्तो समस्या पर्दा सहयोग गर्दै आएका हौं । एकपटक फेरि नेपाली समूदाय एक भएर मनिषालाई आफ्नो सपना पूरा गर्ने यात्रामा देखिएको अवरोध हटाउन सहयोग गर्न म विनम्र आग्रह गर्दछु ।” एनआरएन अष्ट्रेलियाले समेत उनको उपचारमा आयोजित कार्यक्रमलाई सफल बनाउने भन्दै सहभागिताका लागि आग्रह गरेको छ । यस मिट एण्ड ग्रिट कार्यक्रम निकी कार्कीले निशुल्क रुपमा गरेर सहयोग गरेकी छिन् । उनी तिरीमिरी नाईटमा सहभागी हुनका लागि अमेरिकाबाट केही दिन अघि सिड्नी आएकी हुन् । मिट एण्ड ग्रिटमा १५ डलर प्रवेश शुल्क राखिएको छ । यस विषयमा थप जानकारीका लागि उषा बारियालाई ०४३३६८६७११ मा वा रविन्द्र शर्मालाई ०४६६२१०६५४ मा सम्पर्क गर्न सकिनेछ ।