इटालीमा गएको शक्तिशाली भूकम्पमा परी कम्तिमा ३७ जनाको मृत्यु भएको छ ।

राजधानी रोमनजिक रहेको पेरुगिए शहरको दक्षिणी क्षेत्रलाई केन्द्रविन्दु बनाएर ६ दशमलव २ म्याग्नेच्युटको भूकम्प गएको अमेरिकी भूगर्भीय सर्वेक्षण युएसजीएसले जनाएको छ ।

भूकम्पमा परी अहिलेसम्म ३७ जनाको मृत्यु भएको पुष्टि भएको छ भने १ सय ५० जनाभन्दा बढी बेपत्ता छन् । धेरै जना भग्नावशेषमा पुरिएको आशंका गरिएको छ । मध्य इटालीमा घरहरु भत्किएको त्यहाँका सरकारी अधिकारीहरुले बताएका छन् । अमाट्रिसे शहरका मेयरका अनुसार शहरको आधा भाग पूर्णरुपमा ध्वस्त भएको छ ।

यस्तै अकुमोली शहरमा पनि थुप्रै घर भत्किएको बताइएको छ । पेरुगिए शहरको आधा भाग नै ध्वस्त भएको बताइएको छ । स्थानीय समयअनुसार आज बिहान ३ बजेर ३६ मिनेटमा गएको भूकम्पको गहिराई १० किलोमिटर मात्रै रहेको छ । भूकम्पको धक्का राजधानी रोममा पनि महसुस भएको स्थानीय सञ्चारमाध्यमले जनाएका छन् । भूकम्पको धक्का २० सेकेन्डसम्म महसुस गरिएको थियो । भूकम्प गएपछि इटालीमा भागदौड मच्चिएको छ ।

इटालीमा सन् २००९ मा गएको ६ दशमलव ३ म्याग्नेच्युटको भूकम्पमा परी ३ सय जनाले ज्यान गुमाएका थिए ।