ब्रिटिस खेलाडी एण्डी मरे अमेरिकामा जारी युएस ओपन टेनिस प्रतियोगिताको क्वाटरफाईनबाटै बाहिरिएका छन् ।

बुधबार राति भएको खेलमा मरेलाई जापानी खेलाडी केई निशिकोरीले पाँच सेटमा हराएका हुन् । दोस्रो वरियताका मरे विरुद्धको खेल निशिकोरीले १–६, ६–४, ४–६, ६–१ र ७–५ को सेटमा जितेका हुन् । निशिकोरीको यो जीत ब्रिटिश खेलाडी एण्डी मरे विरुद्ध करीयरमा भएका कुल ९ खेलमध्येको दोस्रो जित हो । जितसँगै निशिकोरी यु.एस. ओपन टेनिसको सेमिफाईनलमा पुगेका छन् भने मरे यो वर्षका चारवटा ग्रान्ड स्लाममध्ये पहिलो पटक सेमीफाईनलमा पुग्न असमर्थ भएका छन् ।

युसएस ओपनका अन्य खेलहरुमा विजयी हुँदै नोभाक जोकोभिच र गेल मोन्फील्स पनि सेमिफाईनलमा पुगीसकेका छन् ।

उता महिलातर्फ डेनमार्ककी क्यारोलिन वोज्नीयाकी, जर्मनीकी एन्जेलिक केर्बर र चेक गणतन्त्रकी क्यारोलीना प्लीस्कोभा सेमिफाईनलमा पुगेका छन् ।