कारागारका सुरक्षा प्रमुख र चौकीदार नै पक्राउ !
रामेछाप जिल्ला कारागारका सुरक्षा प्रमुख र चौकीदार नै पक्राउ परेका छन् । मदिरा सेवन गरेको अभियोगमा प्रहरीले प्रहरी नायव निरीक्षक छत्र पण्डित र चौकीदार खड्गबहादुर नेपालीलाई पक्राउ गरेको हो । कारागार सुरक्षा प्रमुख र चौकीदारले शुक्रबार राति मदिरा सेवन गरेका थिए ।
विशेष सुराकीका आधारमा सदरमुकाम मन्थलीबाट गएको प्रहरी टोलीले उनीहरुलाई पक्राउ गरेको हो । पक्राउ परेका दुवैलाई जिल्ला प्रहरी कार्यालय रामेछापको हिरासतमा राखिएको छ ।
सुरक्षा संवेदनशीलतालाई ख्याल नगरी कारागारबाट निस्केर बजारक्षेत्रमा मदिरा सेवन गरेको अवस्थामा फेला परेकाले उनीहरुलाई पक्राउ गरिएको जिल्ला प्रहरी कार्यालय रामेछापले जनाएको छ ।
