सिड्नीमा तिहारको अवसरमा आयोजना हुन लागेको सांगीतिक कार्यक्रम रमाइलो साँझ तिहारको माझका विषयमा पत्रकार सम्मेलन सम्पन्न भएको छ । सिड्नीको रकडेलस्थित थर्ड आई एण्ड बारमा आयोजना गरिएको पत्रकार सम्मेलनमा कार्यक्रममा आफ्नो प्रस्तुति दिने कलाकारहरु हाँस्यविधाका सन्दिप क्षेत्री, गायनका धर्मेन्द्र सेवान, राजकुमार गोश्वामी र श्रेया सोतांगले आफुहरु देशको सिमानाबाट टाढा भएका नेपालीहरुलाई तिहारको माझमा नेपाली गीत संगीतको माध्यमबाट मनोरञ्जन दिन आइपुगेको बताएका थिए । पत्रकारहरुको जिज्ञासामा जवाफ दिँदै हाँस्य कलाकार सन्दिप क्षेत्रीले समय अनुसार अघि बढ्नुपर्ने अन्यथा दर्शक श्रोताले नै उनीहरुको मूल्यांकनका आधारमा पाखा लगाइदिने बताएका थिए । मुख्यतः युवाहरुलाई लक्षित गरी आयोजना गरिएको यो कार्यक्रम सिड्नी सिटीस्थित होटल सार्कको स्पेश बारमा साँझ ६ बजेदेखि ११ बजेसम्म आयोजना गरिनेछ भने यसपछि आफ्टर पार्टी भन्दै डिजे सुशीलले नचाउनेछन् । पत्रकार सम्मेलनमा कार्यक्रमको आयोजक असनेपाल ईभेन्टसका सल्लाहकार भिष्म भण्डारीले युवाहरुको साझमा सदैव रहने भन्दै यस किसिमका कार्यक्रमको आयोजनाबाट नेपाली समूदायलाई जोड्न विशेष मद्दत पुग्ने बताएका थिए । उक्त अवसरमा कार्यक्रम आयोजक संस्थाका प्रवक्ता खगेन्द्र सत्यालले कार्यक्रममा सहभागिताका लागि आह्वान गर्नुभयो । २३ अक्टोबरका दिन आयोजना गरिने यस कार्यक्रममा प्रवेश गर्नका लागि १८ वर्षभन्दा माथि भएको परिचय खुल्ने परिचयपत्र देखाउन अनिवार्य गरिएको छ ।

– खगेन्द्र सत्याल